Një ngjarje tejet e rëndë ka ndodhur në Librazhd. Persona ende të paindetifikuar kanë hyrë në banesë dhe kanë dhunuar një grua shtatzënë.
Ngjarja e tmerrshme është regjistruar në fshatin Marinaj mbrëmjen e djeshme.
Sipas policisë, një grua shtatzënë, njëkohësisht nënë e dy fëmijëve, është dhunuar në sy të tyre në banesën e saj.
Nga të dhënat e dala deri tani, mësohet se gruaja është dhunuar nga persona të paidentifikuar të cilët janë futur gjatë orëve të mbrëmjes në banesën, ku jetonte shtetasja me inicialet F.G.
Zonja e shtëpisë, ka qenë vetëm me dy fëmijët e saj, pa bashkëshortin, i cili ndodhej në punë në momentin që persona me maska i kanë hyrë brenda banesës.
Përveçse e kanë dhunuar, gruas shtatzënë i kanë prerë edhe flokët. Në gjendje të rënduar psikologjike, ajo ka njoftuar policinë, e cila e ka transportuar në spital për të marrë ndihmë mjekësore.
Sipas policisë, personat e maskuar dyshohet se janë futur në banesë për të grabitur, por kur janë ndeshur me rezistencën e gruas shtatzënë, ata e kanë dhunuar në sy të fëmijëve dhe më pas janë larguar./Fjala.al/
