Partia Demokratike i ka kërkuar informacion zyrtar Prokurorisë së Dibrës për dosjen 184, që në përmbajtje ka vjedhjen e votave në Qarkun e Dibrës.
Përmes një shkrese zyrtare Partia Demokratike kërkon transferim të dosjes tek Strukturat e Prokurorisë së Posacme Antikorrupsion (SPAK).
Sipas saj është faktuar bashkëpunimi për vjedhjen e zgjedhjeve në Qarkun e Dibrës midis një grupi të strukturuar kriminal dhe Kryeministrit Edi Rama, bashkëpunëtorëve të tij Damian Gjiknuri, Saimir Tahiri, Ulsi Manja, Xhemal Qefalia, Pjerin Ndreu, shefi i komisariatit të Dibrës Robert Aga dhe disa personazhe të tjerë që u emëruan kryebashkiakë si Dionis Imeraj, Valbona Sako dhe Agron Mala.
“Në Qershor 2019, gazeta prestigjioze gjermane Bild, publikoi përgjime, pjesë të kësaj dosje hetimore, ku provohej qartë, jo vetëm veprimtaria kriminale për vjedhjen e zgjedhjeve vendore në Dibër, por edhe fakti se kjo veprimtari ishte e strukturuar, në kuadër të një grupi të strukturuar kriminal, që drejtohej personalisht nga Edi Rama, Kryeministër i Shqipërisë dhe Damian Gjiknuri, deputet i Kuvendit të Shqipërisë”- thuhet në letrën e Sekretarit të Përgjithshëm të PD, Gazment Bardhi për Prokurorinë e Dibrës.
PD i ka drejtuar 3 kërkesa prokurorisë së Dibrës, e cila e mban prej 6 muajsh dosjen 184.
1. Informacion në lidhje me gjendjen e procedimit penal 184/2016
2. Informacion nëse Prokuroria e Dibrës ka shpallur apo jo mos-kopetencën dhe nëse aktet i kanë kaluar SPAK
3. Njohjen me provat dhe aktet e administruara deri tani./Fjala.al
