Qeveria shqiptare ka paguar në vitin 2019 rreth 2. 8 milionë euro për Veteranët e Luftës. Bëhet fjalë për transferta nga buxheti i shtetit me përshkrimin për pagesa “Transferim për Kompensim Suplementar Veteranët e Luftës”. Referuar pagesave të thesarit mësohet se në vitin 2019, janë bërë katër transaksione me vlerë 345 000 000 lekë ose rreth 2.8 milionë euro, me përshkrimin për pagesa Transferim për Kompensim Suplementar Veteranët e Luftës.
Veteranë të Luftës së II botërore njohur në vend si lufta Nacional Çlirimtare janë trajtuar me pensione suplementare prej shtatë dekadash që me përfundimin e luftës. Listat e Veteranëve të mbetur gjallë janë bërë shpesh pjesë e debateve mbi vërtetësinë e tyre. Open Data Albania zbardhi pagesat nga buxheti dhe sipas të dhënave mësohet se taksapaguesit shqiptar vijojnë të paguajnë këtë skemë Suplement. Dhe ndërsa viti 2019 ka shënuar shpenzime në vlerën 2.8 milion Euro të shpërndarë në katër transaksione, Viti 2020 ka filluar me një transaksion të vetëm por më i madh në vlerë se totali i katër transheve të bëra në 2019. Në datën 10 Janar ka kaluar në llogarinë përkatëse të thesarit të shtetit një pagesë me vlerë prej 470 000 000 lekë ose 3.8 milion Euro
Në korrik të vitit 2015 qeveria shqiptare vendosi që të rrisë pagesën për veteranët e luftës. Lajmi në atë kohë u bë i ditur nga ministri i Mirëqenies Sociale, Blendi Klosi, gjatë një deklarate për mediat. Qeveria vendosi rritjen me 16 për qind të pagesës për ish-luftëtarët.
“Sot u mor një vendim shumë i rëndësishëm, që prek në mënyrë të drejtpërdrejtë 6,600 veteranët e luftës. Që prej vitit 2007, pra 8 vite më parë, pavarësisht luhatjeve të inflacionit, pensioni i veteranëve ishte i pandryshuar. Rezultoi në ulje reale të pensionit. Qeveria vendos të çojë në vend dinjitet e atyre që luftuan për çlirimin e Shqipërisë, duke rritur pensionin e plotë 6,600 veteranëve, në masën 16%”, theksoi ministri Klosi në daljen e tij për mediat pesë vite më parë. /Fjala.al/
