Irani ka komentuar së fundmi vendimin e Shqipërisë për të dëbuar dy diplomatë të tjerë, të vendosur në Ambasadën në Tiranë.
Abbas Mousavi, zëdhënës në Ministrinë e Jashtme iraniane, ka deklaruar se Shqipëria ka bërë shumë gabime dhe kërkon që vendi ynë të kthehet në rrugën e duhur, duke mos lejuar vendet e treta të ndikojnë në marrëdhëniet midis dy shteteve.
“Shqipëria ka bërë shumë gabime dhe ne ndjejmë se disa ngjarje në rajonin tonë kanë krijuar disa keqkuptime te Shqipëria. Në rekomandojmë që ata mos t’i lidhin marrëdhëniet tona të mira me një vend të tretë. Shqipëria duhet të kthehet në rrugën e duhur pasi ajo në të cilën është tani nuk është konstruktive”, është shprehur Mousavi.
Mohamed Peimanemati, këshilltar i tretë i Ambasadës së Iranit në Tiranë, dhe Seyed Ahmad Hosseini, atashe kulturor, u dëbuan pesë ditë më parë nga vendi ynë pasi rezultuan se kryenin veprime në kundërshtim me statusin e diplomatit.
