Për vitin 2020, aplikimet e shtetasve shqiptarë për azil në Greqi do të refuzohen, pasi nga autoritetet greke Shqipëria është përfshirë në listën e vendeve të sigurta.
Fillimin e këtij viti qeveria greke e përfshiu Shqipërinë në Listën e 12 vendeve të sigurta.
Vendimi u mor mbi bazë të udhëzimeve të Komisionit Europian dhe ndër vendet e tjera në listë ishin edhe Gjeorgjia, Ukraina, Maroku, Algjeria, Tunizia, etj.
Sipas Shërbimit grek për azil, 3053 shtetas shqiptarë paraqitën gjatë vitit 2019 aplikimin për azil.
Po sipas këtij Shërbimi, shtetasit shqiptarë renditen të pestët për nga numri i kërkesave pas shtetasve nga Siria, Afganistani, Pakistan dhe Iraku.
Por shtetasit shqiptarë renditen të dymbëdhjetët për nga njohja e azilit, me vetëm 0,2 % të numrit të përgjithshëm të aplikimeve.
Të dhënat zyrtare greke tregojnë se shqiptarët paraqitën 2135 ankimime gjatë vitit 2019 ndaj mosnjohjes së azilit nga autoritete greke, ndërsa një pjesë e rasteve mbeten ende të pashqyrtuara.
Të dhënat e Qendrës greke për Azilin flasin se vit pas viti numri i azilkërkuesve shqiptarë është rritur në Greqi, raporton VOA.
Sipas të dhënave zyrtare greke në vitin 2013 shënoheshin vetëm 419 kërkesa për azil, ndërsa në vitin 2018 ky numër u rrit ndjeshëm dhe shkoi në 3319 kërkesa.
