Vetëm pak orë pasi në mediat online u publikua video e një të riu që bënte manovra të rrezikshme me makinë përpara komisariatit nr.6 në Tiranë, policia ka reaguar duke e ndaluar.
Në një njoftim të shpërndarë mbrëmjen e sotme, Policia bën me dije se 29 vjeçari është shoqëruar në ambientet e komisariatit të Kombinatit, përpara të cilit filmoi sfidën e tij për uniformat blu.
“Si rezultat i kontrolleve të shtuara, në Unazën e re u bë i mundur ndalimi dhe shoqërimi i drejtuesit të automjetit në ambientet e Komisariatit të Policisë Nr. 6 Tiranë, ku po kryhen dhe verifikimet e nevojshme, me qëllim procedimin penal të personit përgjegjës për veprimet dhe sjelljet e rrezikshme në rrugë, si dhe procedimin administrativ për shkeljet e rregullave të qarkullimit rrugor të konsumuara nga drejtuesi i këtij automjeti, që kanë rrezikuar jetën e tij dhe të përdoruesve të tjerë të rrugës që gjendeshin në afërsi të vendit ku automjeti po kryente manovrat e rrezikshme”, thuhet ndër të tjera në njoftimin e policisë.
