Marrëveshja e re midis Kosovës dhe Serbisë për vendosjen e një linje të re ajrore Prishtinë-Beograd mund të vendosë në rrezik pavarësinë e Kosovës.
Sipas dokumenteve që përfaqësuesit e Kosovës firmosën në Berlin, aty është shmangur përdorimi i emrave të institucioneve të Kosovës.
Duke iu referuar këtyre dokumenteve, gazeta Koha Ditore, shkruan se po shmanget përdorimi i terminologjisë së duhur të emrave të institucioneve shtetërore të Kosovës.
Në një rast konkret, nuk përmendet ASHNA – që është shkurtimi i Agjencisë shtetërore të Fluturimit. Por, përdoret vetëm “Njësia e Trafikut Ajror” – një term që është përdorur në kohën përpara se të shpallej pavarësia e Kosovës.
Në dokumentin e nënshkruar në Berlin nga të tria palët e pranishme, Autoriteti i Aviacionit Civil TË Kosovës përmendet si “Autoriteti i Aviacionit Civil NË Kosovë”.
“Palët shprehin interesin për të themeluar linjën ajrore speciale Beograd-Prishtinë. Njësiti i Kontrollit të Trafikut Ajror në Aeroportin e Prishtinës është autoriteti kompetent për ofrimin e shërbimeve të tilla brenda Sektorit të KFOR-it. KFOR-i është autoriteti kompetent për të siguruar mbikëqyrjen se kushtet e shërbimeve të ATC-së brenda Sektorit të KFOR-it po kryhen në mënyrë të sigurt. Njësiti i ATC-së në Aeroportin e Prishtinës do të ofrojë shërbimet e ATC-së për të gjithë avionët e EuroWings the transportuesit e Lufthansa Group, brenda hapësirës ajrore të KFOR-it. Komunikimi direkt do të zhvillohet ndërmjet ofruesve të shërbimeve në aeroporte, përfshirë ofruesit e ATC-së në aeroportin e Beogradit, ose ndonjë ATC tjetër të nevojshëm”, thuhet në dokument.
Dokumenti i Berlinit, i përmbledhur në më pak se dy faqe, në fakt është një marrëveshje midis katër institucioneve, Lufthansa Airlines, Aeroporti Ndërkombëtar i Prishtinës, KFOR-it dhe Administrata Civile e Kosovës.
Kjo tregon se autoritetet kosovare dhe serbe kanë nënshkruar dy dokumente krejt të ndryshme mbi linjën ajrore direkte Prishtinë –Beograd.
