Njeriu që është marrë disa herë i pandehur për “Falsifikimin e dokumenteve”, me qëllim tjetërsimin e pronave në bregdet dhe “pastrim parash”, është dënuar nga gjykata e Vlorës me 5.4 vite burg.
Vendimi ndaj Pëllumb Petritaj, është dhënë në 21 janar nga gjyqtari i Vlorës, Skënder Haluçi, ndërsa prokuror i çështjes penale, ka qenë Albert Kuliçaj.
Prokurori Albert Kuliçaj është personi që në 21 dhjetor 2019, iu vendos një sasi e konsiderueshme tritoli në makinën e parkuar shumë pranë banesës së tij në Vlorë.
Dënimi me 5.4 vite burgim për Pëllumb Petritaj është i dyti, pasi në muajin prill 2018, Petritaj është dënuar sërish nga gjykata e Vlorës me 3 vite burgim për akuzën e “falsifikimit të dokumenteve” me qëllim tjetërsimin e një sipërfaqe toke në zonën e Zvërnecit.
Pas dhënies së dënimit, do jetë gjykata e Apelit në Vlorë, e cila do vendosi ose jo që dënimi i biznesmenit të marrë formë të prerë.
