Qeveria shqiptare ka dorëzuar në parlament një ligj, që u lehtëson kushtet pensionistëve nga vendet e Bashkimit Evropian për të jetuar në Shqipëri. Pensionistët përjashtohen nga taksa mbi të ardhurat. “Objektivi kryesor që synohet të arrihet me anë të këtij ndryshimi është përjashtimi nga tatimi mbi të ardhurat për shtetasit e huaj dhe shtetasit e huaj me origjinë shqiptare që përfitojnë pension, si kusht lehtësues për vendqëndrim në territorin e Republikës e Shqipërisë’-thuhet në relacionin që shoqëron ligjin. Pensionistët duhet të plotësojnë disa kushte, një prej të cilëve është të mos jetë i dënuar.
Kushtet që duhet të përmbushin pensionistët që ‘emigrojnë” në Shqipëri:
a) Të jenë përfitues të pensionit sipas legjislacionit në fuqi në vendet ku e kanë përfituar atë;
b) Të jenë pajisur me leje qëndrimi në territorin e Republikës së Shqipërisë;
c) Të mos kenë qenë ndonjëherë të dënuar në shtetin e vet apo në Republikën e Shqipërisë ose në ndonjë shtet tjetër për vepra penale, për të cilat ligji parashikon dënime me jo më pak se 3 (tre) vjet heqje lirie;
ç) Të kenë marrë përgjigje pozitive nga struktura përgjegjëse administrative për përjashtim nga tatimi mbi të ardhurat personale të përfitimit të pensionit. Kërkesa e palëve të interesuara duhet të shoqërohet me dokumentet provuese për parashikimet e shkronjave “a”, “b” e “c”, të kësaj pike, si dhe një kopje të pasaportës së tyre të lëshuar nga shteti ku kanë vendbanimin e përhershëm.
Trajtimi fiskal
Strukturat e organeve tatimore janë përgjegjëse dhe garantojnë trajtim të barabartë të çdo kërkese të depozituar nga palët e interesuara për të qenë përfitues nga zbatimi i këtij ligji. Në rast përgjigjeje negative ose të mungesës së përgjigjes nga struktura përgjegjëse administrative, brenda afateve ligjore të parashikuara, palës së interesuar i lind e drejta për ankimim administrativ sipas parashikimeve të Kodit të Procedurave Administrative.
Personat përfitues, humbasin të drejtën e përjashtimit nga tatimi mbi të ardhurat në kushtet e mos ripërtëritjes së lejes së qëndrimit në Republikën e Shqipërisë, kur për këtë nuk është bërë kërkesë në strukturat përgjegjëse deri 6 muaj nga data e mbarimit të lejes. Në rast përgjigjeje negative ose të mungesës së përgjigjes nga struktura përgjegjëse administrative, brenda afateve ligjore të parashikuara, palës së interesuar i lind e drejta për ankimim administrativ sipas parashikimeve të Kodit të Procedurave Administrative
