Është rritur në 14 numri i viktimave nga tërmeti me magnitutë 6.5 që goditi mbrëmjen e sotme Turqinë. Ndërkohë 225 persona kanë mbërritur në spitale për të marrë mjekim dhe dy prej tyre raportohen në gjendje më të rëndë.
Autoritetet kanë paralajmëruar se numri i viktimave mund të rritet edhe më tej për shkak se shumë persona ndodhen të bllokuar nën rrënoja.
Për këtë situatë ka reaguar edhe ministri i Jashtëm i Kosovës, Behgjet Pacolli, i cili ka shprehur gatishmërinë e Forcave të Sigurisë për të ndihmuar Turqinë.
“Jemi duke e ndjekur nga afër situatën e tërmetit në Turqi. Shpresojmë dhe lutemi që të mos ketë viktima dhe mendimet tona janë me miqtë tanë turq në këto momente. Forca e Sigurisë së Kosovës është e gatshme të ofrojë çdo ndihmë të nevojshme për zonat e prekura”, ka shkruar Pacolli në ‘Twitter’.
Epiqendra e tërmetit ishte në afërsi të qytetit Elazig, në juglindje të vendit, ndërsa thellësia ishte 10 km.
Tërmeti i parë i regjistruar rreth orës 19:00, që ishte edhe më i fuqishmi, u pasua nga dy pasgoditje të forta, përkatësisht 5.4 dhe 5.1.
