Pas një jave me trazira në ndeshje, akuza ndaj arbitrave dhe dënime të lojtarëve e trajnerëve nga Federata Shqiptare e Futbollit, kampionati më i madh i këtij sporti në vendin tonë, Kategoria Superiore rikthehet sërish.
Java e 19-të e Superligës do të zhvillohet në dy ditë, më 25 dhe 26 janar që përkojnë dhe me ditët e fundjavës.
Nesër në orën 14:00 do të startojë në Korçë ndeshja e parë, ajo midis skuadrës së Skënderbeut dhe vlonjatëve të Flamurtarit. Korçarët e vendit të tetë vijnë në këtë ndeshje pas fitore 3-2 që morën me përmbysje ndaj kampionëve aktual të Superligës, ndërsa Flamurtari i vendit të fundit nga ana tjetër vjen pas humbjes me Vllazninë me rezultatin 2-0 dhe bllokimit të merkatos nga FIFA.
Në orën 17:00 në Shkodër do të luajnë Vllaznia me Laçin, ku kurbinasit do të tentojnë të marrin fitoren e radhës për t’u ringritur sërish në vendet e para.
Ndërsa, ditën e djelë do të zhvillohen tre ndeshjet e tjera, ku Teuta, e cila në këtë sfidë vjen pas humbjes me Laçin do të presë në shtëpi në orën 16:00 skuadrën e Bylisit, që në ndeshjen e fundit u mund me rezultatin 2-1 nga skuadra e Tiranës, në një përballje shumë të diskutuar.
Po në të njëjtën orë Tirana do të luajë sërish në stadiumin “Selman Stërmasi”, por këtë herë me Luftëtarin e Gjirokastrës. Kryeqytetasit vijnë në këtë sfidë pas katër fitoreve radhazi dhe duket se skuadra e trajnerit Egbo është në rrugën e fitoreve të tjera.
Gjirokastritët e vendit të nëntë të kategorisë nga ana tjetër morën një barazim me skuadrën e Kukësit, që nga ta u cilësua si i padrejtë, pasi u diskutua një gol i anuluar dhe një penallti që nuk iu dha skuadrës së Luftëtarit.
E cilësuar si supersfida e javës, në orën 19:00 në stadiumin “Air Albania” do të luajnë skuadra e Kukësit me atë të Partizanit. Vendi i parë i Superiore do të presë kampionët ende në fuqi në një ndeshje që pritet të japë shumë. Megjithatë duhet theksuar se java e 18-të nuk ishte më e mira për asnjë prej tyre, pasi Partizani u mund në Korçë me rezultatin 3-2, ndërsa verilindorët e patën shumë të vështirë që të merrnin një barazim nga Luftëtari./Katerina Tafa/Fjala.al/
