Të mërkurën e 29 janarit do të nisë aplikimi i banorëve që kanë mbetur pa shtëpi si pasojë e tërmetit shkatërrimtar të 26 nëntorit. Ministri për Rindërtimin, Arben Ahmetaj deklaroi sot se në çdo bashki do të hapet një zyrë ku qytetarët mund të bëjnë aplikimin, ndonëse do të jenë përfaqësuesit lokal që duhet të kontaktojnë të parët personat e prekur.
Faza e aplikimit do të zgjasë deri më 6 shkurt.
“Nga e mërkura do duhet të ketë në cdo bashki nga një zyrë, ku jo qytetarët duhet të vijnë tek ju, por të merrni qytetarët për të bërë aplikimin online. Platforma bazohet në vetë deklarimin e qytetarëve. Do të deklarojnë dëmet. Të gjitha Bashkitë do të dërgojnë tre persona që do trajnohen nesër në orën 11:00, procesin e aplikimit. Që të kenë të saktë zonën, sipërfaqen e banesës. Kryetari i njësisë administrative do e marrë me shkrim, njësia administrative e hedh online. Aty ku qytetari ju jep të drejtën të mblidhi dokumentacionin vetë, atëherë do ia merrni ju. Është detyra juaj. Kemi bërë një manual të detajuar.
Fillon vlerësimi dhe apelimi, brenda fazës së dytë. 30 ditë duhet të ketë mbaruar aplikimi me dosjet e shoqëruara. S’ka të bëjë të ketë akt pronësie. Çdo njëri nga ne ka një dokument të tillë në lidhje me pronësinë, përveç atyre që nuk kanë filluar procesin e legalizimit dhe s’kanë asnjë dokument. Në bazë të saj, do ta shikoni që dy janë programet kryesore. Rindërtimi, pallate dhe banesa private. Rikonstruksioni”, tha Ahmetaj.
Në proces do të përcaktohet edhe një sistem pikëzimi për banesat që do të ndërtohen me prioritet.
