Podgorica është përfshirë mbrëmjen e djeshme në trazira. Kanë qenë anëtarë të komunitetit serb që janë përplasur në policinë teksa kjo e fundit po mundohej të hiqte një mural nacionalist.
Ngjarja ndodhi në lagjen Zlatica të kryeqytetit malazez ku një grup njerëzish ishin vënë “në mbrojtje” të muralit ‘trengjyrëshi’ (trengjyrëshi simbolizon flamurin nga koha e mbretit malazez Nikolla, që ishte një mbështetës i madh i serbëve).
Policia bëri disa herë thirrje për shpërndarjen e grupit, por ata u kundërpërgjigjen me mjete piroteknike. Në këtë moment filloi përplasja me policinë, për të zgjatur deri rreth orës 23:00, kur turma u shpërnda.
Disa qytetarë, përfshirë tre policë, kanë mbetur të lënduar nga përplasja, ndërsa raportohet edhe për disa të arrestuar.
Situata në Mal të Zi është tensionuar midis autoriteteve dhe komunitetit serb, kryesisht pas miratimit të Ligjit për lirinë e besimit fetar. Ligji parashikon shtetëzimin e pronave për të cilat Kisha Ortodokse nuk mund të dëshmojë se kanë qenë të sajat edhe përpara vitit 1918, kur Mali i Zi u përfshi në Mbretërinë Serbo-Kroate-Sllovene.
Kisha Ortodokse në Mal të Zi është në varësi të Kishës serbe, ndërkohë që serbët i frikësohen rënies së rolit të kishës në jetën sociale dhe politike të vendit.
