Presidenti Meta me anë të një statusi në Facebook, ka kujtuar Ditën Ndërkombëtare të Kujtesës, e cila përkujton viktimat e Holokaustit. Meta është shprehur se ky gjenocid dhe shkele e të drejtave të njeriut nuk duhet të përsëritet më.
Presidenti nuk ka lënë pa përmendur edhe ndihmën që populli ynë u ka bërë hebrenjve duke mos dorëzuar asnjë te pushtuesi. Sipas tij ky akt human i shqiptarëve në periudhën më të errët të njerëzimit e bën të ndihet krenar.
Statusi i presidentit:
Në Ditën Ndërkombëtare të Kujtesës, përkujtojmë me nderim miliona viktima të pafajshme të mizorisë së pashpirt të Holokaustit, në mënyrë që antisemitizmi, mungesa e tolerancës, bashkëjetesës, dhe shkeljet e lirive e të drejtave të njeriut, të mos përsëriten KURRË MË.
Dy dekada më parë në zemër të Europës, fatkeqësisht ishim dëshmitarë të masakrave e spastrimit etnik dhe fetar në Bosnje e Hercegovinë, dhe Kosovë.
Gjenocide dhe akte të tilla çnjerëzore ndaj kujtdo që i përket një feje, etnie apo kombësie ndryshe, nuk duhet të ndodhin dhe nuk duhen lejuar të ndodhin KURRË MË në botën ku jetojmë!
Krenar për kombin tonë, që në periudhën më të errët të njerëzimit, mbrojti dhe mirëpriti mijëra hebrenj të larguar nga vendet e tjera, duke mos dorëzuar asnjë te pushtuesit.
#ËeRemember #NeverAgain/Fjala.al
