Lideri i Vetëvendosjes, Albin Kurti dhe ai i LDK-së Isa Mustafa, rreth orës 16: 30 të ditës së martë, kanë hyrë në Kuvendin e Kosovës, për ku është paralajmëruar se do të mbahet edhe një takimi tjetër i tyre.
Kryetari i LDK-së, Isa Mustafa, ka thënë se nuk e di nëse në këtë takim do të jenë të pranishëm ambasadorët e vendeve të Quint-it.
“Nuk e di, sepse ne nuk i kemi ftuar. I ka ftuar Kurti. Ne do të shkojmë në takim. Në rast se vijnë ambasadorët, do ta mbajmë takimin. Nëse jo, të shohim pastaj”, ka thënë Mustafa.
Ai ka theksuar që LDK-ja nuk ka lëvizur nga qëndrimi i saj, duke thënë se zgjidhja të cilën e ka ofruar kjo parti është zgjidhja që funksionon dhe që u ofron të dyja palëve partneritet të fortë dhe balancim të pushteteve.
Rreth orës 18:00, në Kuvendin e Kosovës kanë hyrë përfaqësuesit e zyrës së BE-së në Kosovë dhe të ambasadave të vendeve të Quint-it.
Në takimin e Kurtit dhe Mustafës, janë duke marrë pjesë shefja e zyrës së BE-së në Kosovë, Natalyia Apostolova, ambasadori i Gjermanisë, Christian Held, ambasadori i Mbretërisë së Bashkuar, Nicholas Abbott si dhe përfaqësues të ambasadës së Shteteve të Bashkuara të Amerikës, të Francës dhe të ambasadës së Italisë në Prishtinë.
Vendet e Quint-it, më herët, kanë thënë përmes një deklarate se nuk mbështesin asnjë kandidat ose parti politike në Kosovë, gjatë procesit të formimit të qeverisë.
