Aksidenti ajror në Afganistan i aeroplanit Bombardier E-11A ka lënë pas shumë pyetje pa përgjigje.
Dyshimet e para ishin se ky avion ishte civil dhe thuhej se kishte 80 veta në bord, por detajet e reja zbuluan se aeroplani i përkiste forcave ajrore amerikane.
Pentagoni nuk ka dalë akoma me një deklaratë zyrtare mbi aksidentin e ndodhur në Dih Jak, zonë e cila kontrollohet nga talibanët.
Por burime zyrtare amerikane kanë konfirmuar tashmë se trupat e dy shtetasve amerikanë janë gjetur në mbetjet e mjetit fluturues. Për sa i përket identitetit të tyre nuk ka asnjë konfirmim zyrtar, edhe pse talibanët me anë të zëdhënësit të tyre Zabindullah Mujahid, deklaruan se forcat e tij e kishin rrëzuar aeroplanin, dhe se brenda tij ndodheshin oficerë të lartë amerikanë.
Agjensia iraniane Mehr News, në bashkëpunim me “Veterans Today”, i cili është një portal afër Kremlinit që merret me studime ushtarake, deklaroi se ndër viktimat është edhe një nga oficerët e Lartë të CIA-s, Michael D’Andrea, i njohur për gjuetinë e tij të Osama Bin Laden dhe së fundmi edhe protagonist, sipas këtyre burimeve, të sulmit kundër gjeneralit iranian Qassem Soleimani.
Pavarësisht këtyre deklarateve të cilat janë afër propagandës së Moskës , pritet një version zyrtar nga Washingtoni mbi çështjen e aeroplanit E-11A.
