Në burg kanë mbetur vetëm 4 persona nga 19 policët dhe zyrtarët e arrestuar për abuzimet me pronat, ndërkohë një prej tyre vijon të mbetet në kërkim.
Gjykata e Apelit e Durrësit (zhvendosur në Kavajës pas dëmtimeve nga tërmeti) ka liruar nga qelitë 4 zyrtarët, më konkretisht Petrit Nezirin, ndihmës specialist policia Manzë; Ndricim Shikën, ndihmës specialist policia Shijak; Adem Likën, ndërtues dhe Gjergji Gerco, sekretar njësisë administrative Sukth.
Ndërkohë vijojnë të qëndrojnë në qeli Dëshir Dakoli me detyrë ndihmës specialist/SPZ, në Komisariatin e Policisë Durrës; Haxhi Sherra, ndihmës specialist Komisariati Shijak; Ermal Petova (OPGj Manzë); Agim Osmani, ndihmës specialist policia Durrës; Haxhi Sherra, ndihmës specialist Komisariati Shijak ndërsa Gani Dama-polic patrulle është ende në kërkim.
Ja si ishte skema e abuzimeve me pronat
Të arrestuarit kishin krijuar një mekanizëm korruptiv me qëllim përfitimin e parave, ndërsa në këmbim jepnin lejet për ndërtime të shumta të paligjshme si objekte banimi, magazina, objekte biznesi etj. Me anë të kësaj skeme abuzive ata shmangnin zbatimin e legjislacionit në fushën urbanistike dhe sigurimit teknik të tyre. Por përveçse kanë favorizuar biznesmenët të ndërtojnë pa leje, kanë falsifikuar dokumentet, nuk kanë raportuar ngjarjet kriminale, dhe më tej akoma, kanë fshehur kallëzimet e bërë nga qytetarë të ndryshëm për abuzimet që po ndodhnin në këto zona me ndërtimet pa leje. Sipas dosjes hetimore, policët i lejonin ndërtimet pa leje kundrejt pagesave nga 1500 deri në 7 mijë euro.
Mbeten në burg
Dëshir Dakoli (me detyrë ndihmës specialist/SPZ, në Komisariatin e Policisë Durrës)
Haxhi Sherra (ndihmës specialist Komisariati Shijak
Ermal Petova (OPGj Manzë)
Agim Osmani (ndihmës specialist policia Durrës)
Gani Dama-polic patrulle (në kërkim)
Lihen të lirë
Petrit Neziri (ndihmës specialist policia Manzë)
Ndricim Shika (ndihmës specialist policia Shijak)
Adem Lika (ndërtues)
Gjergji Gerco (sekretar njësisë administrative Sukth)
