Tërmeti mbrëmë ktheu sërish ankthin kryesisht në zonat që janë prekur më shumë nga lëkundja e 26 nëntorit. Edhe pse pretendohet se janë paslëkundjet e asaj date, lëkundja e mbrëmshme ishte e fortë dhe mjaft kërcënuese. Për këtë shkak janë aktivizuar në media një mori ekspertësh të cilat janë përpjekur të japin këshillat e tyre që lidhen me reagimin e një momenti të tillë.
Një nga këshillat më të domosdoshme është dhënë nga sizmiologu Edmond Dushi i cili iu bën thirrje shqiptarëve mos të qëndrojnë para pallateve kur dalin jashtë shtëpie, pasi rreziku është po kaq evident sa të jesh brenda. Madje sipas tij nuk duhet qëndruar në asnjë vend ku ka pemë, shtylla apo gjëra që janë të lidhura me tokën, po a e ka Tirana në ndonjë vend një hapësirë të tillë?
Katër udhëzimet e tij janë:
1- Në momentin që ndodh tërmeti duhet të gjejmë pikat më të forta të strukturës së objektit ku jeni. Është e kotë të vraponi sepse koha e lëkundjes është e vogël, çështje sekondash. Pastaj me kalimin e lëkundjes kryesore, në mënyrë të qetë dhe të organizuar duhet të dalim nga objektet.
2- Evitoni në mënyrë kategorike ashensorët.
3- Mos qëndroni në sheshet poshtë pallateve apo në mjedise poshtë pallateve pasi jemi prapë të rrezikuar nga objektet që bien nga katet e sipërme ose nga vetë struktura e objektit.
4- Qëndroni në zona të hapura sa më të çliruara nga ndërtesa apo pemë e shtylla, që janë objekte të futura në tokë dhe mund të ndikohen gjatë valëve sizmike.
Por në këto udhëzime, asnjë prej ekspertëve nuk tregojnë se ku duhet të qëndrojnë kryesisht banorët e qytetit të Tiranës dhe të Durrësit, ku thuajse përqindja më e madhe e sipërfaqes është e mbushur me kulla, pallate shumëkatëshe dhe ndërtesa po të tilla. n.k/Fjala.al/
