Parlamenti Evropian aprovoi ditën e djeshme marrëveshjen për Brexit të Boris Johnson. Me një votim përfundimtar Britania e Madhe u largua nga Bashkimi Evropian.
Eurodeputetët në Bruksel e mbështetën me shumicë ratifikimin e ‘Marrëveshjes së Tërheqjes’, me 621 vota pro të mërkurën në mbrëmje.
Sic shkruajnë dhe mediat britanike në parlament kishte skena emocionale ndërsa po njoftohej rezultati, me eurodeputetë që japin duart njeri-tjetrit në shenjë solidariteti, disa që përqafohen, disa festojnë me gota shampanje por kishte edhe nga ata që po qanin.
Kreu i Partisë Brexit, Nigel Frage përshëndeti lajmin duke tundur flamujt e Bashkimit me aleatët e tij ndërsa deklaroi se Britania “nuk do të kthehet më kurrë”.
Disa eurodeputetë të tjerë britanikë thanë se shpresojnë që Britania e Madhe të kthehet sërish një ditë në Bashkimin Evropian.
Presidentja e Komisionit Evropian, Ursula von der Leyen, tha se ratifikimi i marrëveshjes së tërheqjes “ishte vetëm një hap i parë” drejt partneritetit të ri midis Bashkimit Evropian dhe Mbretërisë së Bashkuar.
“Të dyja duhet të bashkojmë forcat në fusha të tilla si ndryshimi I klimës dhe të të kërkojmë një partneritet akoma më të ngushte pas daljes së Mbretërisë së Bashkuar.”, u shpreh Ursuala von der Leyen./Fjal.al
