Komisioni i Disiplinës është mbledhur të enjten dhe ka marrë në shqyrtim çështjet e javës së fundit të kampionatit dhe të Kupës së Shqipërisë.
Gjithësej janë dhënë 9-të vendime.
Bie në sy gjoba prej 1 milion lekësh të vjetër për Besëlidhjen. Gjoba vjen pasi gjatë takimit kundër Partizanit ditën e djeshme, tifozët kanë hedhur koret “Rama ik”, çka detyruan arbitrin kryesor të ndërpriste takimin.
Gjithashtu mes vendimeve të tjera bien në sy ndëshkimet për Luftëtarin. Zyrtari i Luftëtarit, Artur Danaj, është pezulluar me tetë ndeshje. Ndërsa klubi gjirokastrit duhet të dëmshpërblejë Tiranën për dëmet që tifozët kanë shkaktuar në “Selman Stërmasi”.
Vendimet:
KF Besëlidhja, për sjellje të gabuar të spektatorëve, dënohet me gjobë në masën 100.000 (njëqind mijë) Lekë.
Zyrtari i KF Luftëtari, Artur Danaj për ofendim ndaj zyrtarit të ndeshjes dënohet me 8 (tetë) ndeshje pezullim nga aktiviteti futbollistik.
KF Luftëtari detyrohet të dëmshpërblejë dëmtimet e shkaktuara brenda 15-ditëve në stadiumin “Selman Stërmasi” nga lojtarët/stafi përkatës sipas akt konstatimit të personave përgjegjës në stadium.
KF Vllaznia për sjellje të gabuar të spektatorëve dënohet me gjobë në masën 100.000 (njëqind mijë) Lekë. Në rast përsëritje KF Vllaznia paralajmërohet se do të jetë objekt i masave të përshkallëzuara sipas KDS.
KF Oriku detyrohet të dëmshpërblejë brenda afatit prej 15-ditëve dëmtimet e shkaktuara në stadiumin “Elbasan Arena” nga ekipi i KF Oriku sipas akt konstatimit të personave përgjegjës në stadium.
Ekipi i KF Iliria për dështim në organizimin e ndeshjes dhe sjellje të gabuar të spektatorëve dënohet me 6 (gjashtë) ndeshje pa spektatorë.
Zyrtari i KF Turbina Bledar Malaj për sjellje të gabuar ndaj zyrtarëve të ndeshjes dënohet me 2 (dy) ndeshje pezullim nga aktiviteti.
Zyrtari i KF Turbina E. Belshi për sjellje të keqe ndaj zyrtarit të ndeshjes dënohet me 8 (tetë) ndeshje pezullim nga aktiviteti.
Pranimin e kërkesës së Lojtarëve të KF Teuta Fabjan Beqja dhe Amer Duka. Pezullimin e pjesës së mbetur të dënimit. Lojtarët vendosen në provë për një afat 6 muaj dhe në rast të përsëritjes së shkeljes disiplinore gjatë periudhës së provës dënimi i pezulluar i shtohet dënimit të ri.
