Gjyshe Vera, me të cilën kryeopozitari Lulzim Basha publikoi sot një foto, nuk është një pensioniste e thjeshtë e cila të gjithë kohën e shpenzon me punët e shtëpisë. Ndryshe nga shumë gjyshe të tjera, gjyshe Vera, ose Pranvera Bodinaku, zgjedh të aktivizohet politikisht, madje drejton edhe një sindikatë.
Foto e publikuar sot nga Basha tërhoqi vëmendje të madhe. Ja çfarë ai shkruante: “Me Verën, gjyshen që çdo ditë e nis me pazaret dhe preokupimin për t’i gatuar familjes. Pensionistja që si shumë të tjerë në Shqipëri kujdesen mes sakfricave për fëmijët, nipërit dhe mbesat.”
E megjithëse Basha e paraqet Bodinakun thjesht si një pensioniste, ajo është më shumë se kaq. Bodinaku drejton Sindikatën e Tregtisë dhe Turizmit dhe shfaqet edhe si analiste në Shijak Tv.
Demokratja ndjek edhe takimet që zhvillojnë përfaqësuesit e PD-së me grupe të caktuara.
Pavarësisht se Basha i fshehu këto të dhëna interesante, Pranvera, ashtu siç do bënte çdo demokrat me zemër, nuk i ka kushtuar rëndësi të madhe, por e ka rishpërndarë në Facebook-un e saj foton me kreun e PD-së.
