Albi Kurti ka kërkuar votëbesimin e tij për të qenë kryeministër i Kosovës. Në fjalimin e tij, Kurti ka theksuar se qeveria e tij do të jetë qeveria që do të kursejë paranë publike.
Ai premtoi gjithashtu se qeveria e tij do të ngrejë padi ndaj Serbisë për krimet e luftës. Ndërsa u shpreh se do të vendosë reciprocitetin ekonomik me Beogradin.
“Me këtë program do të jetësojmë premtimet e 6 tetorit, datë kjo që solli ndryshimin politik në vend. Do të jemi qeveri e kursimit të parasë publike, para meje do të jenë 15 ministra e jo 21 sa ishin, do të kemi 33 zv.ministra e jo mbi 80 sa ishin më herët”, ka theksuar Kurti në fjalimin e tij të gjatë.
Në Kuvendin e Kosovës pritet gjithashtu të votohet qeveria e Albin Kurtit, kabinetit i të cilit do të ketë 2 zëvendëskryeministra, 15 ministra dhe 33 zëvendësministra.
Një ditë më parë Lëvizja Vetëvendosje dhe Lidhja Demokratike e Kosovës arritën marrëveshjen për bashkëqeverisje, pas më shumë se dy muajsh nga certifikimi i rezultateve.
Sipas kësaj marrëveshje Vetëvendosja do të marrë postin e kryeministrit dhe gjashtë ministri, si dhe zëvendëskryeministrin e dytë. Ndërsa LDK do të ketë postin e kryetarit të Kuvendit, zëvendëskryeministrin e parë dhe gjashtë ministri.
Minoritetet do të kenë tri ministri. Ndërsa lidhur me postin e presidentit do të diskutohet në kohën kur do të zhvillohen zgjedhjet për president.
