Akuzat e vazhdueshme të demokratëve ndaj Taulant Ballës, kreu i Grupit Parlamentar të PS, për miqësinë që ka me Edmond Begon, ish-i dënuar në Itali për trafik droge, janë rikthyer edhe sot në vëmendje. Bego aktualisht është njeri i lirë dhe është shndërruar në biznesmen, por miqësia që ka me Ballën e ka vendosur shpesh herë në qendër të vëmendjes së opozitës.
Partia Demokratike e përmendi sërish sot Begon në kuadër të paketës “AntiKÇK, të miratuar nga Qeveria, që për qëllim ka goditjen e krimit të organizuar.
Por pak orë pas replikave në distancë, kundërshtarët e demokratëve duket se kanë goditur “fort dhe në shenjë”. Në disa portale është publikuar një foto e Lulzim Bashës në avion, ndërkohë që pas tij qëndron njeriu i akuzuar nga demokratët, Edmond Bego.
Në portalet ku është publikuar fillimisht foto, as teksti i shkrimit nuk është ndryshuar, çka bën të dyshosh se ka dalë nga e njëjta dorë. Për foton thuhet se po qarkullon në rrjetet sociale, por pa dhënë më shumë detaje.
Foto të krijon përshtypjen se Basha dhe Bego janë gjendur rastësisht pranë njëri-tjetrit në avion.
Nisur nga kjo foto, vështirë të besohet versioni që po qarkullon në këto portale se “Lulzim Basha po shoqërohet me Edmond Begon”, pasi nëse do të ishte vërtetë kështu, kjo foto me shumë mundësi nuk do të bëhej publike.
