Ka vlerësuar mbështetjen e vazhdueshme që Parlamenti Europian i ka dhënë Shqipërisë në procesin e integrimit europian.
Presidenti Ilir Meta e ka bërë këtë vlerësim gjatë takimit që ka pasur sot me Presidentin e Parlamentit Europian, David Sassoli.
Në këtë kontekst Meta ka thëne se e ka mirëpritur takimin e organizuar së fundmi nga Sassoli me kryetarët e Parlamenteve të 6 vendeve të Ballkanit Perëndimor dhe angazhimet e përbashkëta të shprehura në konkluzionet e këtij takimi të nivelit të lartë.
Gjatë takimit, Presidenti i Shqipërisë, ka theksuar rëndësinë që kanë sundimi i ligjit dhe dialogu gjithëpërfshirës e jo-konfrontues në zbatimin e prioriteteve që lidhen me çeljen e negociatave të Shqipërisë me BE, si dhe për arritjen e standardeve europiane të një demokracie parlamentare.
Ndërkohë Kreu i Shtetit ka mirëpritur gjithashtu gatishmërinë e shprehur nga Presidenti Sassoli për të ndihmuar në tejkalimin e krizës, çka do të çonte në një zbatim më të shpejtë dhe të besueshëm të 9 prioriteteve të Bundestagut.
Nga ana tjetër Presidenti Meta ka përshëndetur edhe angazhimin për të rritur besueshmërinë dhe efikasitetin e procesit të zgjerimit të BE drejt Ballkanit Perëndimor, përmes një qasjeje më demokratike, më transparente, dhe më pranë qytetarëve.
