Kryeministri Albin Kurti ka shkruar një status në ditën e parë të tij në krye të Qeverisë së Kosovës. Ai thotë se në mandatin e tij, nuk të mund të rrinë ulur për shkak të punëve të shumta.
Kurti në Facebook është shprehur se pas ceremonisë ku e mori mandatin, është takuar me ministrat e tij. Kryeministri zotohet se me ta do të bëjë më të mirën e mundshme.
“Sot, mbajta mbledhjen e parë të kabinetit qeveritar. Pas ceremonisë zyrtare dhe dorëzim-pranimit të detyrës së Kryeministrit u takova me ministrat tanë të ri.
Bashkë me ta dhe secilin person që punon në institucionet e Republikës sonë do të bëjmë më të mirën e mundshme për të arritur zhvillim e shtetndërtim për vendin, punë e drejtësi për qytetarët.
Karriget i kemi, por jam i bindur se më shumë do të rrimë në këmbë për shkak të punëve të shumta që na presin”, thuhet në postimin që ka shkruar Kurti.
