Bota e sportit në Francë është përfshirë nga një sërë skandalesh të abuzimeve seksuale, përfshirë këtu Federatën Franceze të Sporteve të Akullit (FFSG), si dhe fushën e futbollit.
Një prej ish-trajnerëve të sporteve të akullit është akuzuar për përdhunim,por tashmë një tjetër rast i rëndë ka dalë në dritë raporton “La Vanguardia”
Pronari dhe presidenti i klubit të futbollit Angers SCO, Said Chabane, ekip i cili luan në divizionin e parë, Ligue 1, është marrë në pyetje dhe arrestuar, pasi u akuzohet për sulm seksual nga një punonjëse.
55-vjeçari me origjinë algjeriane zotëron ndërmarrjen ushqimore Cosnelle. Biznesmeni mori nën kontroll SCO Angers, një klub njëqindvjeçar, në vitin 2011.
Chabane është akuzuar nga një punonjëse, por janë dhe dy viktima të tjera të mundshme që janë identifikuar nga hetuesit për këtë rast. Pronari i klubit kishte prekur vithet e punonjëses dhe pjesët e tjera intime pa pëlqimin e saj.
Në një deklaratë për mediet klubi tregoi se Chabane hedh poshtë të gjitha akuzat dhe: “do të sjellë para drejtësisë të gjitha elementet që do t’i lejojnë atij të rivendosë të vërtetën dhe të ruajë nderin e tij”.-thuhet në reagim.
Pronari Angers me këtë shënim kërkon të vërtetojë pafajësinë e tij dhe për këtë ai është i gatshëm të bashkëpunojë plotësisht në hetim raporton media franceze./Fjala.al/Katerina Tafa/
