Presidenti Donald Trump ka marrë sot një goditje të fortë në procesin e shkarkimit, i njohur si “impeachment”, pasi republikani Mitt Romney ka deklaruar se do të votojë kundër tij. Senatori republikan ka theksuar se Trump si president ka shpërdoruar pushtetin.
“Pyetja e rëndë që Kushtetuta u shtron senatorëve të përgjigjen është nëse presidenti ka kryer një akt ekstrem dhe të egër që arrin në nivelin e “krimit të rëndë”, tha Romney duke shtuar: “Po, ai e bëri”.
Romney theksoi se do të mbështesë akuzën kundër Trump për shpërdorimin e pushtetit, por jo atë të pengimit të Kongresit.
Trump akuzohet se ka nxitur autoritetet në Kiev që të nisin hetimet ndaj ish-zv.presidentit Joe Biden dhe djalit të tij Hunter Biden, në mënyrë që të fillonte dërgimi i një ndihmë ushtarake prej 391 milionë dollarësh për Ukrainën.
Por edhe pse Mitt Romney bëhet senatori i parë republikan nga 53 të tillë që njofton se do të votojë kundër Trump, parashikimet janë që Senati të rrëzojë akuzat kundër Presidentit.
