Kryeopozitari Lulzim Basha është duke zhvilluar një bashkëbisedim me qytetarët në “Facebook”, ku po u përgjigjet pyetjeve të shumta. Një prej tyre ishte edhe nëse vendi do të shkojë në zgjedhje të parakohshme parlamentare dhe Basha theksoi se Partia Demokratike i mbetet këtij qëndrimi.
“Edhe unë uroj shumë. Vendit t’i jepet mundësia përmes zgjedhjeve të parakohshme të zgjedhë një Parlament legjitim. Së dyti që rregullat e lojës të jenë të barabarta për të gjithë. Dhe së treti që këto rregulla të zbatohen të kemi një arbitër të paanshëm. Këtyre kërkesave që kemi shtruar që në shkurtin e vitit të kaluar ne i qëndrojmë”, theksoi Basha.
Sipas Bashës, e vetmja zgjidhje për ndryshim në Shqipëri është që të mos vidhen zgjedhjet.
Kreu i Partisë Demokratike theksoi gjithashtu se do të kërkojë votimin dhe numërimin elektronik për zgjedhjet e ardhshme.
