Opozita do të kundërshtojë çdo iniciativë të koalicionit qeverisës VV-LDK për heqjen e taksës ndaj mallrave serbe. Sipas deputetit të AAK-së, Rasim Selmanaj, përveç një seance të jashtëzakonshme plenare, mund të përdoren edhe metoda të tjera për të kundërshtuar heqjen e taksës.
Kryeministri i ri i Kosovës, Albin Kurti, është shprehur se taksa ndaj mallrave serbe do të zëvendësohet me reciprocitet të plotë politik, ekonomik e tregtar.
“Ne mendojmë dhe jemi të bindur se taksa duhet të mbetet në fuqi sepse është një argument i fuqishëm në dialog me Serbinë. Ndërsa sa i përket reciprocitetit në rregull të vendoset edhe kjo masë, por kjo nuk do të thotë me u largu taksa… një prej mundësive është seanca e jashtëzakonshme, do të shohim si do të jenë aktivitetet tona për ta kundërshtuar largimin e taksës”, ka thënë Selmanaj.
Sot ndaj deklaratës së Kurtit u shprehën edhe zyrtarë të partive të tjera opozitare.
