Mëngjesin e sotëm një sasi e konsiderueshme tritoli shpërtheu në një banesë të braktisur në lagjen “Qafë Hardhi”.
Ngjarja ndodhi rreth orës 02:30, ndërsa u dëgjuan dy shpërthime të njëpasnjëshme pasi sasia e tritolit ishte e vendosur në vende të ndryshme. Ndërsa shtëpia së cilës i është vendosur tritoli mësohet se është e Nikollë Arrës, babai i ish-basketbollistit Nikolin Arra.
Sasia e tritolit ishte e konsiderueshme dhe si rrjedhojë edhe shpërthimet ishin të fuqishme. Por, fatmirësisht nuk ka pasur të lënduar pasi prej pak kohësh familja Arra ishte larguar.
Ndërkaq, ish-basketbollisti Nikolin Arra, ishte larguar nga Shqipëria së bashku me familjen për në Shtetet e Bashkuara të Amerikës. Ai ka qenë pjesë e skuadrës së Vllaznisë për shumë vite.
Arra ka pasur probleme me drejtësinë kur në vitin 2016, ishte njëri mes 9 të arrestuarve si inspektor në Drejtorinë Rajonale të Tatim-Taksave në Shkodër, por më pas u deklarua i pafajshëm nga gjykata për akuzat që u ngritën kundër tij.
