Nga Nikoleta Kovaçi/
Djali që shihni në foto është nga Peja. Është pinjoll i familjes Helshani dhe sot konsiderohet një ndër njerëzit më të kërkuar në Kosovë. Mbi të rëndojnë një sërë akuzash të rënda që kanë të bëjnë me vrasje e plagosje, ndërkohë që policia e Kosovës kërkon ndihmën e gjithë opinionit publik për ta gjetur. Ai është 45 vjeç dhe mendohet se fshihet në Kosovë. Por, Adem Helshani, është një nga personat që u bë objekt i një përplasjeje edhe në rrjetet sociale me njërin nga rivalët e fisit të tij duke i kërkuar që ai të dorëzohej pasi sido që ai do të vritej nga një djalë i familjes Kelmendi. E nëse kërcënuesi i tij u vu në pranga kohë më parë për këtë kërcënim e për disa akuza të tjera, Adem Helshani është i kërkuar në të gjithë botën për vrasje dhe për disa tentativa vrasjesh dhe plagosjesh.
Në njoftimin e shpërndarë sot thuhet se Policia e Kosovës kërkon ndihmën e qytetarëve për arrestimin e një personi të dyshuar për vrasje e tentim vrasje. Bëhet fjalë për Adem Helshanin, nga Ozrimi i Pejës! Përmes një komunikate drejtuar medieve, Policia Rajonale e Pejës ka njoftuar se ka siguruar lejen për publikimin e fotos me shënime tjera të personit të kërkuar më Urdhëresë të Gjykatës Themelore Pejë, me qëllim lokalizimin dhe rrjedhimisht arrestimin e tij. “Policia e Kosovës kërkon nga qytetarët e Republikës së Kosovës që kushdo që ka informacion për vendndodhjen e personit të dyshuar në foton e bashkangjitur, të lajmërojë Policinë e Kosovës apo të lajmërohet në stacionin më të afërt policor”- thuhet në komunikatë. Mes dy familjeve Helshani dhe Kelmendi ka një hasmëri të frikshme. Janë me dhjetëra të vrarë dhe të plagosur mes palëve, ku përveç atentateve, vrasjeve të më shumë se disa personave, ata kanë përdorur edhe mina të telekomanduara kundër njëri tjetrit. Madje u tha se bëhet fjalë vrasës me pagesë nga Shqipëria të cilët janë përdorur për të kryer atentatet.
