Në Kinë ka shpërthyer zemërimi publik kundrejt qeverisë kineze, sipas një raportimi të bërë nga BBC. Shkak ka qenë vdekja e një mjeku kinez, i cili tentoi të paralajmëronte rrezikun nga virusi kohë më parë. Mjeku u prek nga koronavirusi teksa po kuronte pacientët në Wuhan.
Dhjetorin e shkuar ai u dërgoi një mesazh mjekëve të tjerë, duke i paralajmëruar për një virus vdekjeprurës që mendonte se dukej si SARS. Por policia i tha se duhej të ndalonte komentet false dhe se po hetohej për shpërndarje thashethemesh.
Vdekja e mjekut ka zgjuar komentet në të gjithë Kinën dhe populli kinez akuzon qeverinë se ka nënvlerësuar rëndësinë e këtij virusi dhe fillimisht ka tentuar ta mbajë sekret, raporton BBC.
Vdekja e mjekut ka nxitur po ashtu edhe një debat për mungesën e lirisë së fjalës në Kinë. Një trupë antikorrupsion në Kinë thotë se ka nisur një hetim për këtë çështje.
Më herët qeveria kineze e pranoi se ka pasur probleme dhe mungesa në mënyrën se si është trajtuar virusi. Doktori i ndjerë me bashkëshorten e tij ishin në pritje të një fëmije.
