Presidenti Ilir Meta ka ngritur dyshime mbi “Operacionin Forca e Ligjit” që synon të kontrollojë pasuritë e paligjshme të personave të dënuar dhe të përfshirë në krimin e organizuar. Në një intervistë për “Zërin e Amerikës”, Meta theksoi se legjislacioni ka qenë i plotë për të luftuar krimin dhe se kjo luftë nuk bëhet me fushata.
“Lufta kundër krimit të organizuar është një kërkesë e vjetër, ajo çka është e re është imperativi për të dhënë rezultate të prekshme. Mendoj se legjislacioni ka qenë i plotë në të gjitha drejtimet dhe duhet të tregohemi të kujdesshëm se kjo është një luftë që nuk zhvillohet me fushata.
I gjithë legjislacioni ka qenë aty, askush nuk e ndalon Qeverinë të ngrejë task forca, por kur bëhen ndërhyrje në legjislacion ato duhet të jenë të mirëmenduara dhe të mos krijojnë mbivendosje të karakterit institucional”, tha Meta.
Ndonëse jo në mënyrë të drejtëpërdrejtë, Presidenti iu bashkua qëndrimit të shumë kritikëve të OFL-së dhe “Anti KÇK-së”, duke pretenduar se ky aksion i mbivendoset SPAK-ut dhe e mbingarkon atë si institucion.
“Çdo përpjekje që rrezikon të shtyjë në periferi apo të vërë në trysni institucionet e reja të drejtësisë, nuk i shërben forcimit as të besueshmërisë së tyre dhe as forcimit të shtetit ligjor. Të gjithë duhet të reflektojnë për të rivendosur besimin e qytetarëve te institucionet dhe te politikanët”, u shpreh Meta.
Sa i përket sistemit zgjedhor, Ilir Meta la të kuptojë se nuk e kundërshton idenë e një sistemi tjetër.
“Themelore është vullneti për zgjedhje të lira e të ndershme. Unë do të preferoja çdo zgjidhje që i jep integritet Parlamentit dhe që deputetët të kenë lidhje më të drejtëpërdrejtë me qytetarët”, tha ai.
