Këngëtarja shqiptare me famë botërore, Rita Ora, është ftuar për të kënduar në festivalin “Estéreo Picnic 2020”, në Kolumbi.
Rita Ora, mbiemri i vërtetë i së cilës është Sahatçiu, nw një intervistë për median e njohur amerikano-jugore, SHOCK, ka rrëfyer shumëçka nga jeta dhe karriera e saj. Nw kwtw rrwfim ajo nuk ka hezituar të flasë me krenari edhe për Kosovën.
“Rita Ora njihet si interpretuese e shumë hiteve, që e kanë ngjitur atë në majat e top-listave të Mbretërisë së Bashkuar dhe jo vetëm. Kur Rita ishte fëmijë, në vitin 1991, familja e saj la Kosovën nisën luftërat në Ballkan. Në vitin 1998, shpërtheu konflikti midis forcave serbe dhe shqiptarëve. Pas një lufte që la më shumë se 13,000 të vdekur, vendi arriti pavarësinë në vitin 2008. Me një popullsi prej 1.8 milionë njerëzve, Kosova ka PBB-në më të ulët për frymë në Evropë”, citon media kolumbiane Rita ishte e ftuar në një koncert të veçantë për dhjetëvjetorin e pavarësisë së Kosovës në vitin 2018.
“Për të arritur këtu duhej një udhëtim i gjatë”, u tha artistja mediave. “Por unë mendoj se është vetëm fillimi i një udhëtimi të jashtëzakonshëm për vendin tonë”.
29-vjeçarja ka treguar se nëna e saj, Vera Sahatçiu-Ora, është personi model i saj.
“Nëna ime është personi më frymëzues dhe mahnitës që njoh. Familja ka qenë gjithmonë dhe do të jetë gjëja më e rëndësishme në jetën time. Ne kemi qenë gjithmonë afër dhe mbështetemi shumë tek njëri-tjetri”.
Në pyetjen e fundit të kësaj interviste, Rita Ora ka theksuar edhe njëherë se çfarë do të thotë për të vendi i saj i origjinës.
“Jam shumë krenare për origjinën time dhe nuk do ta harroj kurrë se nga vij. Do të thotë gjithçka për mua”, ka përfunduar rrëfimin e saj për SHOCK artistja me famë botërore.
