Kreu i PR-së, Fatmir Mediu ka hedhur një ide të re: formimin e federatës së djathtë. Në studion e Abc News-it, ai deklaroi se opozita duhet të bëj gjithçka që është në funksion të marrjes së çdo vote të elektoratit të djathtë.
Mediu sqaroi se formula e propozuar nga aleatët e Lulzim Bashës do i shërbejë edhe vetë Partisë Demokratike, duke shtuar se nëse një propozim i tillë nuk merret parasysh partitë e vogla në koalicion do të duhet të shkrihen pasi nuk mund të ekzistojnë vetëm si shtojca dhe në funksion të partive të mëdha.
“Dy rrugë ka, – tha Mediu, – Ose do të shkrihen partitë e vogla ose do të përfaqësohen në elektorat”.
Ai u shpreh se PD ka patur qendrim pozitiv ndaj këtij projekti.
“Brenda koalicionit opozitar drejtuese është PD. Ajo që kërkojmë ne (partitë e vogla) është të formësohet një grup koalicion brenda koalicionit që të jemi në sinergji me njëri-tjetrin. Ky nuk është konflikt por është marrëdhënie. Është një formacion që maksimalizon votën dhe për t’u formuar ky kolacion kërkohet ndërhyrje në Kodin Zgjedhor. Pra kemi kërkuar një federatë të djathtë”, u shpreh Fatmir Mediu.
