Balerinët, akrobatët, solistët dhe instrumentistët do të marrin shtesë pensioni për vështirësi në punë. Brenda muajit gusht Qeveria do të ketë gati ndryshimet ligjore që do t’u sigurojnë shtesë në pension disa kategorive artistësh që konsiderohen profesione të vështira. Drafti është publikuar tashmë në programin e projekligjeve të Qeverisë dhe është parashikuar të miratohet brenda katërmujorit të dytë të këtij viti.
Në program sqarohet se nëpërmjet këtij projektligji synohet përfitimi i pensionit në bazë të niveleve të përcaktuara të punonjësve artistë dhe jo vetëm në administratës shtetërore. Nga ndryshimet ligjore parashikohet të përfitojnë artistë të baletit, artistët e valleve të asambleve shtetërore dhe private, por edhe akrobatët e gjimnastët e cirkut.
Në listën e përfituesve janë edhe solistët e operave, të teatrove muzikale dhe të asambleve shtetërore, koristët e operave të teatrove muzikale dhe të asambleve shtetërore, si dhe muzikantët e veglave të frymës të orkestrave dhe të bandave shtetërore. Të gjitha profesionet e sipërpërmendura përkufizohen në projekligji profesione të vështira që, sipas Projektaktit të Këshillit të Ministrave, duhet të trajtohen me pension të posaçëm.
