Marrëdhëniet e Edi Ramës me Albin Kurtin nuk janë ato marrëdhënie të mira që ishin pak vite më parë. Akuzat dhe kundërakuzat nuk kanë munguar midis dy kryeministrave dhe për këtë arsye vizita e Kurtit sot në Tiranë është pritur me interes.
Në ceremoninë e pritjes të organizuar në Pallatin e Brigadave, duket se Rama i ka dhënë mesazhet e para homologut nga Kosova.
Në ceremoni Rama kishte nxjerrë vetëm tre ministra, dy prej tyre me origjinë nga Kosova, Gent Cakaj dhe Besa Shahini. Ministrja e tretë ishte Elisa Spiropali.
Për Cakajn dhe Shahinin nuk ka patur reagime pozitive nga Lëvizja Vetëvendosje që kur ata u emëruan në postet e ministrit të Jashtëm dhe ministres së Arsimit. Cakaj është kritikuar nga vetë Kurti për qëndrimet që ka mbajtur në raport me marrëveshjen Kosovë-Serbi, si dhe është konsideruar “njeriu i Baton Haxhiut”, ndërsa Shahini është bashkëshortja e Dardan Moliqajt, ish-deputet i Vetëvendosjes, sot pjesë e partisë kundërshtare të PSD.
Takimi midis Kurtit dhe ministrave të Tiranës ishte në pamje të parë një takim i ftohtë.
