Ilir Meta, Gramoz Ruçi dhe Lulzim Basha nuk i kanë fshehur konsideratat për Albin Kurtin, kryeministër i Kosovës. Ata mirëpritën në selitë e tyre kryeministrin e ri, të cilit i kanë vlerësuar figurën si politikanë dhe sakrificat përgjatë viteve.
“Qeveria e tij i ka të gjitha mundësitë të jetë një shembull pozitiv i mirëqeverisjes në rajonin tonë”, i ka thënë presidenti Meta Kurtit.
Kryeparlamentari Ruçi ishte edhe më “i papërmbajtur” në vlerësimet për Kurtin: “Nën lidërshipin Tuaj, Qeveria e Republikës së Kosovës do t’i përballojë me sukses sfidat e vështira të zhvillimit, integrimit dhe fuqizimit të rolit e kontributit të Kosovës si një faktor paqeje, sigurie e stabiliteti në rajon. Sakrificat Tuaja si politikan konseguent janë një garanci për realizimin e këtij misioni dhe vënien në jetë të programit ambicioz qeverisës. Kuvendi i Shqipërisë do të jetë si gjithmonë në mbështetje të bashkëpëunimit midis të dy vendeve dhe do të nxisë edhe më tej bashkëpunimin ndërqeveritar.”
Edhe kryeopozitari Basha është shprehur shumë i gatshëm për bashkëpunim me Qeverinë e Kurtit: “Kryeministri Kurti, qeveria e Kosovës, institucionet e Kosovës dhe qytetarët e Republikës së Kosovës mund të mbështeten, siç janë mbështetur deri më sot, plotësisht tek Partia Demokratike, tek opozita e bashkuar për t’i dhënë çdo ndihmë dhe për të marrë çdo vendim që do të mbështesë objektivat e tyre, sot në opozitë dhe nesër, kur qytetarët e Republikës së Shqipërisë të na besojnë qeverisjen e vendit me votën e lirë dhe të ndershme.”
