Një aksident ka ndodhur mesditën e sotme në kryeqytet, ndërsa autori nuk është ndaluar ende nga policia. Sipas informacioneve zyrtare, më datë 12.02.2020, rreth orës 12:50, në bulevardin “Gjergj Fishta”, në afërsi të Urës së Drejtorisë Vendore të Policisë Tiranë, një mjet ende i paidentifikuar ka aksidentuar shtetasen E.GJ., 63 vjeçe, e cila ndodhet nën kujdesin e mjekëve, jashtë rrezikut për jetën.
Shërbimet e Policisë kanë shkuar menjëherë në vendngjarje dhe së bashku me grupin hetimor po vijojnë punën, për identifikimin dhe kapjen e mjetit qe ka shkaktuar aksidentin. Por janë burime policore që bëjnë me dije se kalimtarët e rastit kanë identifikuar drejtuesen e mjetit që ka aksidentuar gruan. Të dhënat flasin për një gazetare e cila dyshohet se është larguar nga paniku nga vendi i ngjarjes. Deri në këto momente, mësohet se nuk është bërë dorëzimi dhe as ndalimi i saj ndërsa bëhet me dije se dyshimet e para bien mbi shtetasen I.B., një emër i njohur i medias.
Burime spitalore tregojnë se gruaja e plagosur ka marrë ndihmën e parë në spital dhe se mjekët kanë bërë me dije se ka dalë nga gjendja e rrezikut. Tashmë priten të dhënat policore për ndalimin e personit që ka aksidentuar të moshuarën. Policia bëri me dije se kërkimet po vijojnë për ndalimin e personit që e shkaktoi aksidentin. n.k/Fjala.al/
