Kryedemokrati Lulzim Basha kërkon me ngulm zgjedhje të parakohshme edhe pse një kërkesë e tillë është hedhur poshtë nga mazhoranca.
Sipas Bashës, asgjë nuk ka ndryshuar në qëndrimin e opozitës për ta çuar vendin në zgjedhje të parakohshme.
Në një deklaratë për mediat, pas takimit me ambasadorin e BE-se, Luigi Soreca, Lulzim Basha theksoi se “e vetmja zgjidhje për krizën totale në vend janë zgjedhjet e lira e të ndershme”.
“Gjithë beteja jonë është që zgjedhjet e parakohshme të mbahen sa më shpejt. Kjo është rruga e vetme që shqiptarët të zgjedhin qeverisjen e tyre që t’u ofrojë më shumë mundësi ekonomike e punësimi. Gjithçka që po shohim është produkt i krizës politike, që emrin ia ka venë vete i pari i qeverisë. Kriza ekonomike është produkt i krizës politike, KÇK-ja sot në qeveri është kryeministri dhe veglat e tij në pushtet”.
Kur u pyet se nëse PD do të pranojë zgjedhje vendore dhe jo parlamentare në të njëjtën ditë, Basha tha se “Nuk ka ndryshuar asgjë në qëndrimet tona, zgjedhjet parlamentare dhe ato lokale në një ditë. Nuk është lista e dëshirës së Lulzim Bashës dhe Partisë Demokratike, është thirrja e çdo shqiptari që të nxjerrim vendin nga kjo krizë. Kjo është beteja, pa u zgjidhur kjo vendi nuk mund të bëjë dot përpara”- u shpreh Basha.
