Është shtyrë për në 24 shkurt 2020, procesi gjyqësor për shqyrtimin e kërkesës për lirim me kusht të biznesmenit të ndërtimit Jurgen Molla.
Vendimi për shtyrjen e procesit gjyqësor është marrë nga gjyqtari Artan Hajredinaj. Pritet që në këtë datë, gjyqtari Hajredinaj, të njihet me raportet e shërbimit të provës që ka përgatitur specialisti i burgut, ku Jurgen Molla, vuan dënimin.
Jurgen Molla, pronar i kompleksit “Molla” në Yzberisht, vijon të vuajë dënimin në burgun e “Shën-Kollit” në Lezhë. Ai është arrestuar në muajin Korrik 2016.
Lajmi konfirmohet nga burime pranë gjykatës së Lezhës, aty ku Jurgen Molla, ka depozituar një kërkesë për lirim me kusht.
Jurgen Molla, njihet si një nga ndërtuesit e shumtë në Tiranë,i cili ka qenë pjesë e një grupi kriminal që trafikonte heroinë dhe rezulton i dënuar me 8.8 vite burgim nga Gjykata e Apelit për Krime të Rënda.
