Patentat e Shqipërisë do të njihen edhe në Turqi. Marrëveshja është nënshkruar sot nga ministrat e Jashtëm të Shqipërisë dhe Turqisë, Gent Cakaj dhe Mevlüt Çavuşoğlu.
Në konferencën e përbashkët për shtyp në Tiranë, Cakaj theksoi se kjo marrëveshje do të shmangë të gjitha burokracitë dhe se shoferët shqiptarë mund të lëvizin në territorin turk duke përdorur patentat shqiptare. Të njëjtin lehtësim do të kenë edhe shoferët turq në Shqipëri.
Pak ditë më parë ishte Greqia që njohu patentat shqiptare.
Në konferencë, Cakaj dhe Çavuşoğlu bënë me dije se janë nëshkruar edhe marrëveshje të tjera. Shqipëria dhe Turqia kanë nënshkruar memorandum bashkëpunimi midis dy akademive diplomatike, si dhe një deklaratë të përbashkët për bashkërendimin e qëndrimeve në organizatat ndërkombëtare në luftën kundër krimit dhe terrorizmit.
