Një ngjarje e rëndë ka ndodhur paraditen e sotme në Ostren të Madh të Bulqizës, ku si pasojë e një bombole gazi, 3 persona kanë vdekur, dhe një tjetër është plagosur, anëtarë të së njëjtës familje.

Në një lidhje telefonike për Fax News, kryebashkiaku i Bulqizës, Lefter Alla tha se kanë humbur jetën nëna me dy fëmijët e saj, ndërkohë që është në gjendje të rëndë vajza tjetër e familjes Tola.

“Unë jam rrugës për në Ostren të Madh. Informacioni paraprak është se kanë vdekur tre persona. Një person i vetëm i familjes është në qendër spitalore. Janë nisur ekipet e spitalit të Bulqizës në drejtim të Ostrenit për t’i ardhur në ndihmë vajzës që ka shpëtuar. Vendi është rreth 1 orë larg nga qyteti”, tha Alla.

Vdekja e tre anëtarëve të një familjeje raportohet se ka ardhur nga një bombol gazi, por deri më tani nuk ka informacion të saktë nëse bombola ka shpërthyer apo viktimat janë helmuar nga rrjedhja e gazit.

Njoftimi i policisë

Në Ostren, Bulqizë, është marrë informacion se në banesë janë gjetur pa shenja jete shtetasja R.T, rreth 40 vjeçe, dhe dy fëmijët e saj (vajza dhe djali), që dyshohet se janë helmuar nga bombola gazit.

Në gjendje të rëndë shëndetësore është dhe një pjestar tjetër i familjes ku po transportohet për në spital.

Grupi hetimor ka shkuar në vendngjarje dhe vijon hetimet për zbardhjen e ngjarjes”.