Ilir Meta duket se ka bërë një kërcënim të hapur ndaj Parlamentit. Teksa po komentonte ligjin e fundit të miratuar nga mazhoranca socialiste që shmang betimin te Presidenti të anëtarëve të Gjykatës Kushtetuese, Meta u shpreh: “Me miratimin e këtij ligji janë jashtë Kushtetutës njëherë e përgjithmonë.”
Meta paralajmëroi në emisionin “Open” kundërpërgjigje me dekrete ndaj Parlamentit.
“Nuk njihet ligji i tyre dhe nuk do të njihet. Do të ketë dekrete, do e shihni. Ata janë një Parlament me probleme të mëdha kushtetuese. Janë një Parlament me një numër antikushtetues. Me miratimin e këtij ligji janë jashtë Kushtetutës njëherë e përgjithmonë”, theksoi Presidentit.
Më tej, Meta shtoi: “Çfarë interesi kanë për shqiptarët këta mafiozë kur i bëjnë Presidentit këtë lojë? Kur bëhet kjo lojë për Gjykatën Kushtetuese, kush e beson se DAP i bën me konkurse emërimet në administratë? Prandaj po shpopullohet Shqipëria.”
Gjatë debatit me gazetarët në studio, Metës iu vu në dukje se Parlamenti mund ta shkarkojë nga detyra, por Presidenti u përgjigj: “Përpara se të më shkarkojnë ata mua, i shkarkoj unë dhe populli shqiptar.”
“Ata të shkarkuar janë. Derisa kanë frikë nga zgjedhjet, të shkarkuar janë. Si mund të bëjë një Parlament me minimumin e përgjegjësisë këto gjëra? Ata të shkarkuar janë”, tha Meta.
