Me rastin e 12 vjetorit të Shpalljes së Pavarësisë së Republikës së Kosovës, kryeministri i Kosovës, Albin Kurti, bashkë me kryetaren e Kuvendit, Vjosa Osmani dhe kabinetin qeveritar ka vizituar Forcën e Sigurisë se Kosovës.
Para të pranishmëve të shumtë, ambasadorë të akredituar në Kosovë, ushtarakë, familje të dëshmorëve, kryeministri Kurti, duke e cilësuar të rëndësishme këtë ditë, tha se uniforma juaj është mishërimi i sakrificës tonë kombëtare dhe i krenarisë e aspiratave qytetare e njerëzore.
“Pa ushtri e pa mbrojtje jemi të dobët e të pambrojtur. Prandaj, ne mburremi për shërbimin tuaj. Sakrifica që ju bëni dhe trajnimet që ju kaloni janë të vështira, por qëllimi që ju keni është fisnik”, tha kryeministri Kurti.
Gjithashtu, Kurti tha se do të punojmë që të ndërtojmë aleanca të reja e të avancojmë sa më shpejtë anëtarësimin në NATO dhe në Bashkimin Evropian.
“Anëtarësimi në NATO është prioritet, prandaj edhe investimet në Forcën e Sigurisë janë të domosdoshme që të bëhemi partnerë të denjë. Integrimi në Bashkimin Evropian është rrugë e gjatë dhe e mundimshme, por rrugë që na forcon.
Reformat që ne duhet të bëjmë janë reforma që ne na duhen për të zhvilluar shtetin e së drejtës, zhvillimin e vendit dhe barazinë në popullsi”, tha kryeministri Kurti.
