Shqipëria u kthye sot nga Konferenca e Donatorëve me plot 1.15 miliardë euro, ku gjysma prej tyre do të jenë në formën e granteve dhe kredive. Edhe pse kjo shumë tejkaloi pritshmëritë e qeverisë shqiptare, shumica prej tyre janë akorduar nga institucionet bankare.
Institucionet bankare të disa prej 100 vendeve të ndryshme të botës do të dhurojnë miliona euro për rindërtimin e Shqipërisë pas tërmetit tragjik të 26 nëntorit.
Rekordin e kanë vendosur bankat islamike me një shumë prej 356 milion eurosh për rikuperimin e biznesit.
“Këto programe do të përcaktohen në përputhje me Shqipërinë”, tha përfaqësuesi i Bankave Islamike. Ndërkaq, Banka Botërore do të japë në formën e huasë rreth 160 mln euro me fokus në sektorin e strehimit. Gjithashtu, Banka Botërore aktualisht po jep asistencë teknike për ligjin e fatkeqësive natyrore dhe rimëkëmbjen.
Në të njëjtin projekt, është edhe Banka Evropiane për Rindërtim dhe Zhvillim, e cila akordoi në formën e huasë, 6 milionë euro për blerjen e pajisjeve për spitalet.
Ndërkaq, Banka Evropiane e Investimeve do të japë 2,5 milionë euro grante për asistencë teknike për rimëkëmbjen. Gjithashtu edhe Banka e Këshillit të Evropës do të japë hua 100 milionë euro. Ndërsa UNICEF, do të akordojë rreth 500 mijë euro.
Rreth 100 shtete grumbulluan 1.15 miliard euro midis tyre edhe institucionet e lartpërmendura do të shkojnë për rimëkëmbjen e zonave të dëmtuara në Shqipëri nga tërmeti i 26 nëntorit, duke nisur që nga institucionet dhe vendet e Bashkimit Evropian, SHBA-të, e deri tek Emiratet e Bashkuara Arabe.
