Erion Veliaj, kryebashkiak i Tiranës, është tërësisht i bindur se Lulzim Basha, kryetar i opozitës, nuk do të bëhet kurrë kryeministër. Në intervistën për “Real Story” në Neës 24, Veliaj theksoi se Basha e tregoi kur ishte kryebashkiak i Tiranës se nuk ia doli dot, ndaj nuk ka asnjë shans për të fituar, pasi qytetarët e kanë provuar që s’di të bëjë asgjë.
Sipas Veliajt, Edi Rama po i drejtohet një fitoreje të tretë bindëse në zgjedhjet e radhës.
“Ai që është i suksesshëm në bashki, u bë kryeministër, ndërkohë që ai që nuk ishte i suksesshëm në bashki dhe nuk performoi dot, ka 3 herë që lloc. Edi Rama i drejtohet një fitoreje të 3-të bindëse si kryeministër i Shqipërisë dhe mezi pres të rifillojmë prapë një bashkëpunim si kurrë më parë të një kryeministri dhe të një kryetari bashkie në Tiranë. Për mua ka qenë një shans i jashtëzakonshëm bashkëpunimi me Edin, për mua ka qenë një ditë që s’duhet humbur, se nuk të vjen kurrë një shans që kryetari i bashkisë dhe kryeministri të gjejnë gjuhën, njëri të ketë pasur punën e tjetrit dhe të ‘klikojnë’ kaq shpejt. Për të gjitha këto arsye mezi pres betejën e radhës, fitoren e radhës, edhe punët e radhës për Tiranën dhe për Shqipërinë”, tha kryebashkiaku Veliaj.
