Orëve të para të ditës së sotme qeveria gjermane ka reaguar nëpërmjet zërit zyrtar të saj, Steffen Seibert, i cili në një postim ju shprehu ngushëllime familjeve të viktimave: Ngushëllimet shkojnë për familjet e viktimave që humbën njerëzit e dashur në një sulm të tmerrshëm. Të plagosurit do të shërohen ndërsa autorët kudo dhe kushdo qofshin do të ndëshkohen”!
Mbrëmë gjithë vendi u trondit nga dy sulme të njëpasnjëshme ku të paktën 11 persona kanë humbur jetën dhe 5 të tjerë kanë mbetur të plagosur rëndë pas disa të shtënave me armë në dy klube të ndryshme nate në Hanau të Gjermanisë. 9 janë viktimat nga dy klubet, që frekuentohen nga komuniteti turk, ndërsa 2 të tjerë, njëri autor i dyshuar bashkë me tjetër person që e shoqëronte u gjetën të pajetë në një banesë.
Disa ambulanca kanë mbërritur menjëherë në vendngjarje për t’iu ardhur në ndihmë të plagosurve. Ndërkaq, autoritetet kanë bërë rrethimin e zonës dhe janë vënë menjëherë në kërkim të autorëve. Helikopterë policie po patrullojnë mbi qytet për të bërë të mundur gjetjen e autorëve.
Sipas raportimeve, sulmi në klubet e natës është kryer në dy faza. Fillimisht ka pasur nga një të shtënë në brendësi të tyre dhe më pas një sulm i dytë ka ardhur nga jashtë kur një makinë garash në lëvizje e sipër ka shtirë me breshëri në drejtim të një prej klubeve. Hanau ndodhet në Hesse, rreth 20 kilometra larg Frankfurtit. Autoritetet lokale bëjnë me dije se, të shtënat e para janë dëgjuar në në Kurt-Schumacher-Platz, shesh qendror në rrethin e Kesselstadt. n.k/Fjala.al/
