Kryeministri i Kosovës, Albin Kurti dhe presidenti Hashim Thaçi së bashku me kreun e shtetit serb Aleksandër Vuçiç janë telefonuar sot nga përfaqësuesi i Lartë i Bashkimit Evropian Josep Borrell, mbi raportet mes Kosovës dhe Beogradit.
Gjatë këtyre bisedave, Borrell ka diskutuar edhe për emërimin e një Përfaqësuesi Special për dialogun Kosovë-Serbi dhe Ballkanin Perëndimor.
“Përfaqësuesi i lartë nënvizoi rëndësinë që reflekton për BE-në dhe atë personalisht që të emërohet një zyrtar në këtë post që ndikon në stabilitetin dhe progresin e këtij rajon drejt rrugës në BE. Josep Borrell ka rikonfirmuar se ai personalisht është i angazhuar fuqishëm që të përkrah perspektivën evropiane të Ballkanit Perëndimor dhe të luaj rolin e tij si lehtësues i dialogut Beograd – Prishtinë”, thuhet në njoftimin e lëshuar nga zyra e Borrel.
Megjithatë, ai nuk ka përmendur një emër konkret, se kush do të jetë i dërguari i posaçëm. Emri më i lakuar deri më tani është ai i ministrit të Jashtëm të Sllovakisë, Miroslav Lajçak, edhe pse Gjermania ka lënë të kuptohet se është përjashtuar si opsion.
Më parë Borrel ka deklaruar se duhet të jetë “dikush që e njeh rajonin”, ndërsa ministri Lajçak as nuk e ka mohuar dhe as pohuar mundësinë që ai të jetë i dërguari i Bashkimit Evropian.
