Taulant Muka, ish-zv.ministër i Arsimit, thotë se vendi ka nevojë për një elitë të re universitare. Ai e komenton si të turpshëm mosreagimin e dekanëve dhe të rektorit të Universitetit të Mjekësisë ndaj përplasjes së një studenti me kryeministrin Edi Rama.
“Diploma juaj biletë për arratisje”, bërtiti dje studenti në Pallatin e Kongreseve teksa Rama po mbante fjalimin në ceremoninë e diplomimit të Universitetit të Mjekësisë. Kryeministri iu përgjigj protestës së studentit duke kërkuar që t’i jepeshin ilaçe për qetësim.
“Është i turpshëm mosreagimi i dekanëve dhe rektorit të Universitetit të Mjekësisë, por edhe profesoratit të mjekësisë, ndaj komunikimit të kryeministrit të vendit në ceremoninë e diplomimit të studentëve të mjekësisë. Aksidenti i djeshëm dhe fjalori i përdorur nga kryeministri duke tallur një student, tregon edhe një herë nevojshmërinë e krijimit të një elite të re universitare që ja kthen universitetin njerëzve të dijes dhe ka kurajën t’i thojë politikës larg duart nga universiteti! Kryeministri i vendit duhet të kuptojë se universiteti është hapësirë ku kultivohet fjala e lirë dhe kritika, dhe jo ku mblidhen pleqtë e fshatit të kuvendojnë duke ndjekur parimin e unit njësoj sikurse ndodh në mbledhjet e qeverisë”, shkruan Muka.
“Nga prindër të dorëzuar nuk mund të lindin studentë të revoltuar!”
